Namo Nidhi 6th Installment update 2025 :
नमो शेतकरी महासन्मान निधी योजना काय आहे?
राज्य सरकारने २०२३ च्या अर्थसंकल्पात पंतप्रधान किसान सन्मान निधी योजनेच्या धर्तीवर ही योजना सुरू केली. याअंतर्गत पात्र शेतकऱ्यांना वार्षिक ६,००० रुपये मदत दिली जाते, जी तीन समान हप्त्यांमध्ये (प्रत्येकी २,००० रुपये) थेट त्यांच्या बँक खात्यात जमा केली जाते. आतापर्यंत या योजनेतून पाच हप्त्यांचे वितरण करण्यात आले आहे.
पाचव्या हप्त्याचा गोंधळ
यापूर्वीचा पाचवा हप्ता विधानसभा निवडणुकीच्या पार्श्वभूमीवर परळी येथे केंद्रीय कृषिमंत्री शिवराजसिंह चौहान यांच्या उपस्थितीत वितरित करण्यात आला होता. मात्र, निधी वितरणाच्या घाईमुळे अनेक शेतकऱ्यांच्या खात्यावर पैसे जमा होऊ शकले नाहीत, असा आरोप करण्यात आला होता.
योजनेचे पात्र लाभार्थी कोण?
नमो शेतकरी महासन्मान निधी योजनेसाठी पंतप्रधान किसान सन्मान निधी योजनेचे (पीएम किसान) लाभार्थी पात्र आहेत. राज्यात पीएम किसानच्या लाभार्थ्यांची संख्या ९२.८० लाख इतकी आहे. पीएम किसानचा हप्ता जाहीर झाल्यानंतर त्याच यादीप्रमाणे नमो योजनेचा निधी शेतकऱ्यांच्या खात्यावर वर्ग केला जातो.
निधी वाढीबाबत मुख्यमंत्री फडणवीसांची घोषणा
मुख्यमंत्री देवेंद्र फडणवीस यांनी अलीकडेच नागपूरमधील एका कार्यक्रमात पीएम किसान आणि नमो शेतकरी महासन्मान निधीच्या एकत्रित मदतीत वाढ करण्याचे संकेत दिले होते. या योजनेद्वारे वार्षिक १२,००० रुपये मिळणाऱ्या शेतकऱ्यांना पुढील वर्षीपासून १५,००० रुपये देण्याचा प्रस्ताव त्यांनी मांडला होता. त्यामुळे प्रत्येक शेतकऱ्याला ३,००० रुपये अधिक मिळतील, अशी अपेक्षा होती.
अर्थसंकल्पात वाढीव निधीची तरतूद नाही
राज्य सरकारच्या अर्थसंकल्पीय अधिवेशनात या वाढीव निधीसाठी तरतूद केली जाईल, अशी अपेक्षा होती. मात्र, अर्थमंत्री अजित पवार यांनी सादर केलेल्या २०२५-२६ च्या अर्थसंकल्पात याचा समावेश करण्यात आला नाही. त्यामुळे शेतकऱ्यांमध्ये नाराजी पसरली आहे.
शेतकऱ्यांसाठी महत्त्वाचा निर्णय
राज्य सरकारने सहाव्या हप्त्यासाठी मंजुरी दिल्याने शेतकऱ्यांच्या खात्यात लवकरच निधी जमा होईल. मात्र, वाढीव मदतीबाबत ठोस निर्णय घेतला जात नाही, तोपर्यंत शेतकऱ्यांच्या अपेक्षा पूर्ण होणार नाहीत. त्यामुळे सरकार या संदर्भात कोणता पुढील निर्णय घेते, याकडे सर्वांचे लक्ष आहे.